ewriters

scrivere per essere letti
Siamo 8.522 ewriters e abbiamo pubblicato 74.968 lavori, che sono stati letti 49.897.012 volte e commentati 55.651 volte. Online dal 3 Gennaio 2000.
 
 



Seguici


Scaffali


lavoro pubblicato venerdì 18 marzo 2011
ultima lettura venerdì 9 agosto 2019

Questo lavoro puo' essere letto da tutti

IO NON FESTEGGIO GENOCIDI. LA VITA E' BELLA.

di GiuseppeConiglione. Letto 1691 volte. Dallo scaffale Generico

Lu cuntu 'n lingua siciliana di l'azzioni ligginnaria di lu patriota Gaitanu Sicilianu ca ammustrau stu manifestu nti lu mentri di la passata di li puliticanti ca jìanu a fistiari l'Unitati d'Italia.

17 Marzu 2011. Nti lu jornu unni tutti si mìntinu a fistiari e scòrdanu tuttu lu sangu ca custau a la nostra Matri Sicilia sta maliditta Unitati, nti lu triunfu di la ritòrica di lu fàusu e di li genti ca tutti pari nti na matinata si suseru taliani, e nti lu jornu unni tutta la storia pari scurdata e li genti sunnu ammammaluccuti 'n facci a tuttu stu vuciari talianu ca canta l’Inno di Mameli, la Sicilia vosi rialari n’àutra pàggina a la millinaria storia di lu sò nnipinnintìsimu. Ppi stu jornu a Roma li forzi di l’òrdini hannu statu attenti a nun pirmèttiri nudda manifistazzioni contra l’Unitati, tutti li strati unni hà passari lu curteu di lu Prisidenti di la Ripùbbrica hannu statu vardati ccu ogni cura e tutti li pirìculi livati: tuttu pari appostu, nun cci hà èssiri nuddu dissenzu, picchì cci sunnu macari tutti li tilivisioni, li jurnalisti sia taliani ca ntirnazziunali, lu Statu Talianu voli fari passari na bedda mmàggini fasulla di la rialitati ppi fari crìdiri veru ca l’Italia è dda Nazzioni ca nun hà statu mai e ammucciari tuttu lu sangu di li massacri ca fici a lu Sud. Ma quarcosa scappa a l’occhiu vardignu di lu Statu Talianu. N'omu, nu sulu omu, ca nun hà pututu stari abbacatu nti la Matri Trinacria hà partutu cummintu ppi dda Roma Patruna, ca ni cumannau nti lu passatu ccu lu Mpiru Rumanu e ni vulissi cumannari ppi l’etirnitati tràmiti la scaciuni di l’Italia Unita, e si jìu a pigghiari na càmmira di hotel ccu balcuni nti la strata ca porta a lu Pantheon, lu tempiu di li dei ca fu fattu custruiri a l’èbbica di Uttavianu Augustu ppi cilibbrari Roma ma cchiossai ancora iddu stissu, na zona cintrali di chidda ca la RAI ni dici di chiamari “festa”. Tràsinu nti lu tempiu ccu granni lustru e fiura fanfarunara tutti chiddi ca ni dìcinu a la tilivisioni c’avemu a chiamari “Auturitati”, ma ca nun sunnu àutru ca genti ca nun sannu mancu iddi picchì sunnu docu e chi stannu jennu a fistiari: iddi cci mìntinu sulu la facci e hannu a cògghiri li voti di cui ammucca li sò lapuna. Auturitati e pulicanti ca putemu canùsciri megghiu sulu siddu taliamu lu sirvizziu di lu 16 marzu di la trasmissioni di Italia 1 Le Iene, putemu canùsciri dicu megghiu, dicu, la granni gnuranza di sti puliticanti di lu Parramentu supra la storia di l’Unitati d’Italia, na gnuranza ca nesci fora comu li vavaluci doppu na frisca chiuvuta di stati. Cc’è cui dici ca Garibaldi fu chiamatu eroe dei due mondi picchì accucchiau lu nord e lu sud (e chissu è nenti ancora!), spunta macari unu ca dici ca la capitali d’Italia nti lu 1945 era Salernu (genti ca ni dìcinu di fistiari la “Sacra Unitati d’Italia” ! ), spunta comu nu quatru anticu Rosy Bindi, la canusciuta puliticanti di lu Partitu Dimucràticu ca quarchidunu dici ca si vulissi candidari a Prisidenti di lu Cunzigghiu sulu picchì fu anzurtata ‘n diretta di lu maistru di lu bunga-bunga, ca dici ca lu 17 marzu 1861 cci fu la Breccia di Porta Pia, ca pirò sicunnu li libbra di storia fussi nti lu 1870, e ca appui quannu capisci d’aviri fattu na mala fiura si metti a rìdiri ‘n facci a la jurnalista spiannuccillu ad idda chi è ca fu stu 17 marzu (comu siddu appui a fari li discursi ritòrichi ammenzu a li fuddi supra l’Unitati cci hà jiri la jurnalista e comu siddu fussi la jurnalista chidda ca è pajata ppi stari a lu Parramentu senza sapiri mancu chi è!), ma la parti ca fa cchiossai di l’àutri arrizzari li carni è chidda di nu diputatu di lu stissu PD ca quannu la jurnalista cci fa la dumanna fa finta ca quarchidunu lu chiama e si ni scappa a cursa. Chissu è lu veru ritrattu di l’Unitati ca ju pozzu ricanùsciri: l’Unitati Ritòrica e ca nun canusci la sò stissa storia. Nu ritrattu ca lu nostru picciottu sicilianu nun voli fistiari e ca anzi lu fa patiri ppi la sorti di lu sò Pòpulu ca nun canusci paci e ca è privatu di nu futuru dignu dintra st’Italia, ca lu vidi comu nu tirruni e lu voli fari emigrari. Lu sò cori dunca accumincia a bàttiri forti, bàttiri forti no ppi la Fàusa Patria ca fora tutti fistìanu e ìnchinu di sicca ritòrica, ma ppi la terra d’unni veni, la stissa terra ca ccu Ducezziu s’arribbillau a li Greci, ca ccu lu servu Eunu s’arribbillau a Roma, la stissa terra ca nti lu 1282 fici scuppiari la Rivota di lu Vèspiru Sicilianu contra li Francisi, ca s’arribbilava a li Burboni e dichiarau la nnipinnenza di la Ripùbbrica Siciliana ccu Ruggeru Sèttimu, la stissa terra ca prima si fici ngannari di l’Italia e appui si cci arribbillau ccu li Briganti e ccu la Rivota di lu Setti e Menzu, rivota ca li Taliani nun si fìciru prubblemi ad affucari nti lu sangu ccu lu ginirali assassinu Raffaeli Cadorna, ca pigghiau a cannunati Palermu di lu mari e fici veru granni nùmmiru di morti, la stissa terra ca fu affucata nti lu sangu nti lu 1893 ppi la Rivota di li Fasci Siciliani, la stissa terra ca nti la sicunna verra munniali fici lu sò esèrcitu partisanu di libbirazzioni nazziunali ca cummattìa contru tideschi e taliani, l’E.V.I.S. di lu cumannanti Antoniu Canepa. Lu richiamu ppi la libbirtati di la sò terra, ca l’Italia privau di la spranza e la misi nti li manu di la mafia, cci desi la forza e lu curaggiu ca fu fattu muttu di lu Vèspiru, l’allustrau ccu la vuci di l’àvuli sò ca parràvanu ‘n sicilianu e no ‘n talianu e l’allustrau la manu nsanguniata stinnuta di lu celu di l’omu ca oggi arriposa gluriusu a lu ciancu di Verga e Muscu e ca ogni annu ni veni ricurdatu lu sacrificiu a Murazzu Ruttu. Fu nti ddu minutu ca l'omu vinutu di la Sicilia, ca ppi l’Italia è l’ùrtima riggiuni di pirifirìa e ppi lu Mpiru Rumanu era pruvincia, si ntisi comu vulari nti lu celu ccu lu disìu anzèmmula a lu cumannanti Canepa e lu sò sognu di libbirtati cci parsi nti ddu minutu ca putissi addiviniri rialitati. Niscìu fora nti lu balcuni di la sò càmmira di hotel ccu nu granni manifestu scrivutu ccu la passioni ppi la terra ca cci adduma lu cori e, jennu a sfidari ppi amuri e no ppi odiu tutti li taliati di cui fistìa senza canùsciri la rialitati stòrica ca fu, ammustrau a lu munnu lu pinzeru sò e chiddu di la Sicilia ca lu 17 marzu chianci e nun fistìa e tutti pòttiru lèggiri facènnusi scànnalu la sintenzia ca mai fu cchiù giusta nti ddu cuntestu:




IO NON FESTEGGIO GENOCIDI. LA VITA E’ BELLA.




Nti ddu minutu l'omu nun fu cchiù nu omu qualegghié ma addivinìu lu granni patriota Gaitanu Sicilianu ca di li nnipinnintisti hà èssiri ricurdatu nti la Storia di lu nostru pòpulu comu lu figghiu di Sicilia ca appi lu curaggiu di manifistari dissenzu nti dda Roma capitali ca fa la patruna ‘n casa nostra. Lu curaggiu di Gaitanu Sicilianu fu pirò duppiu, jìu ad anzulintari nti la sò stissa frasi di dissenzu ccu la scrivuta ‘LA VITA E’ BELLA’ macari chiddu, lu còmicu Benigni, ca ppi tuscanu ca è cci piaci vìdiri ca a tutti pari è fattu ppi forza di fàricci parrari la lingua ca parra iddu, ca chiddi ca fistìanu lu 17 Marzu vìdinu comu nu santu e nu pueta, comu l’omu ca accucchia l’Italia nti li mumenti di difficultati e zoccu dici è sacru comu la Bibbia e nuddu si metti a cuntrariallu. Ma siddu Roberto Benigni havi la sacralitati di lu pirsunaggiu di spittàculu ca s’hà jutu a criari ccu li sò pillìculi nti lu tempu e di omu di lussu ca si fa pajari miliuni di euru ppi li sirati ca fa a la tilivisioni ccu li sordi pùbbrichi, Gaitanu Sicilianu prima di dda sò azzioni nun era nuddu, lu sò nomu annincatu pedi pedi nun avissi fattu scamòviri nuddu pinzeru, lu curaggiu di Gaitanu dunca nun fu sulu chiddu di mittìrisi contru lu Statu Patruni nti lu jornu di la sò festa ma macari chiddu di jiri a tuccari lu cunta-stori ufficiali di chiddi ca fistìanu, l’omu ca fa di l’Unitati d’Italia la fàvula ca veni cuntata a scola a li picciriddi e ca fa finta di nun vìdiri (o nun sapi) tutti li straggi ca foru fatti ppi criari stu Statu Talianu ca cunzumau lu Sud e la Sicilia ppi jiri ad arricchiri lu Nord. Pirò, siccomu l’Italia è un paisi lìbbiru ma nuddu pò manifistari ‘n mannera lìbbira zoccu penza, stu disìu di viritati e libbirtati era addistinatu a finiri sùbbitu picchì n’omu di la sicurezza ccu fari priputenti acchianau malantrinu nti la sò càmmira di hotel e ccu la forza jìu a furzari lu nostru omu ca s'arribbilla a livari lu manifestu amminazzànnulu di dinunziallu nun si sapi ppi quali riatu o ppi quali lesa maistati di suvranu. Chista è la trista vicenna di lu Statu Talianu, nu paisi ca cci piaci fistiàrisi e ma ca nun cci piaci la lìbbira sprissioni di li idei, ca si dici dimucràticu ma anveci cumànninu li mafiusi e unni cui è cuntrariu a la ritòrica di lu fàusu veni fattu stari mutu. Ma siddu ccu la forza si po’ fari azzìttiri na pirsuna ca manifesta la sò libbirtati, nenti po’ fari stari mutu nu Pòpulu stancu di tuttu chissu.



Lu curaggiu e l’azzioni ligginnaria di lu patriota Gaitanu Sicilianu, ccu tuttu ca pòttiru durari sulu picca minuti, vèninu ad arristari e s’agghiùncinu a la Storia di lu Pòpulu Sicilianu e nti nu futuru tanti figghi di sta terra comu a mia la vonnu cuntari a li sò figghi ppi tistimuniari ca nun tutti li Siciliani fistiaru ssu jornu: lu 17 Marzu 2011, festa di l’Unitati e granni ammucciatina di li straggi siciliani e miridiunali ca fìciru li Taliani. Nu pòpulu ca nun canusci la sò storia è addistinatu a mòriri, a costu ca nuatri siciliani la jemu a tramannari di patri ‘n figghiu la nostra storia comu fìciri l’antichi nun ni facemu ammazzari di nuddu.


Commenti

Non ci sono commenti disponibili al momento.


Lascia un commento a questo lavoro:

per lasciare un commento devi effettuare il login: